"Motivation letter" yozishda e'tibor qilish kerak bo'lgan asosiy 5 jihat
📄 "Motivation letter" yozishim kerak? Qanday qilib qiziqarli yozsam boʻladi, deganga oʻxshash gaplarni atrofimizda baʼzan eshitib qolamiz. Xoʻsh, oʻzi bu xat nega kerak va qanday talablari bor? Bu maqolada birgalikda koʻrib chiqamiz.
Oʻzi "Motivation letter" nima?
Sen soʻzlagin, men seni koʻray, deydi Rumiy. Yaʼni, soʻzimiz bizning tafakkurimizni koʻrsatadi. Motivatsiya xati ham xuddi shu kabi sizni koʻrsatib bera oladigan hujjatga oʻxshaydi. Unda maqsadlaringiz, rejalaringiz, qarashlaringiz, shuningdek , qiziqish va qobiliyatlaringiz qanday ekanligi koʻrinadi.
"Motivation letter" qachon yoziladi?
Agar siz xorij universitetlarga topshirmoqchi, grant yutmoqchi yoki chegirma olmoqchi boʻlsangiz, albatta, "Motivation letter" yozish soʻraladi. Faqat bu emas, turli almashinuv dasturlarida qatnashmoqchi, volontyorlik harakatlariga qoʻshilmoqchi va baʼzan tashkilotlarga ishga kirmoqchi boʻlsangiz ham bu kabi xat yuborish talab qilinadi. Demak, qiziqarli, maqsadlar aniq koʻrsatilgan va ertaga sizga foydali boʻluvchi motivatsiya xat haqida bilish manfaatli boʻladi.
Motivatsiya xatining asosiy maqsadi
Xatning maqsadi - nomzodning nima sababdan tanlovga munosibligini ko‘rsatish va uning qanday yutuqlari uni ajratib turishini tushuntirish. Ushbu hujjat tekshiruvchi, ish beruvchi yoki stipendiya beruvchilar e’tiborini tortib, nomzodni keyingi bosqichga o‘tkazish uchun xizmat qiladi.
✍ "Motivation letter"da eʼtibor qilishimiz kerak boʻlgan 5 jihat:
1. Quruq va ishonarsiz gaplardan qoching.
Shunchaki, gapni aylantirib, soʻzni koʻpaytirishga emas, aniq, dalillar bilan yoriting. Yoki balandparvoz va juda qilish qiyin boʻlgan ishlarni bajarib tashlashga vaʼda bermang. Soʻzlaringizdagi samimiylik va haqiqiy istashingiz sezilib tursin.
2. Kreativlikka eʼtiborli boʻling.
Nega, bu qanchalik ahamiyatli degan savol sizda ham paydo boʻlayotgan boʻlsa kerak. Unda shoshmang. Keling, boshidan kelamiz. Siz xatni yozib yuborasiz. Yuborilgan manzilda kim oʻqib koʻradi, kim baholaydi? Albatta, insonlar. Tasavvur qiling, ular bunday xatlardan qanchalab oʻqishadi. Bir xil boshlanuvchi, odatiy jumlalar ularning eʼtiborini tortishi qiyin boʻladi. Chunki, hammamiz ham tez zerikishga moyilmiz. Bizning miyamiz oʻzgacharoq, jalb qiladigan narsalardan hayajonlanadi va hayratlanadi. Shu uchun xat yozayotganda, ayniqsa, boshlanish qismida oʻzgacharoq kayfiyat bera olsangiz, tuygʻularga taʼsir qila olsangiz, yaxshi natija boʻlish ehtimolligi ortadi.
3. Bogʻlanishlarga, fikrlar qurilishiga eʼtiborli boʻling!
Tartib bor joyda fikr tarqoqlashib ketmaydi. Oʻquvchi ham, yozuvchi ham mazmundan yoki mohiyatdan uzoqlashib ketish oldi olinadi. Chunki, asosiy maqsad maʼlum bir sxema asosida yoritib berilsa, tushunish qulayroqdir. Shu uchun mana bunday qurilishni koʻrib chiqsak:
• mundarija kabi kirish qilib olish;
• qisqacha tanishuv boʻlimi (introduction);
• Reja, maqsadlaringizni kengaytirib bitta boʻlim qilib yozish;
• Fikrlaringizni xulosalash;
Bu qurilish asosida xatni yozsangiz, ancha tugallik va yakuniy xulosalar ham koʻrinib turadi.
4. Talablarni oʻrganib chiqib, boshqa misollar bilan ham tanishish foydali.
"Motivation letter" talablari odatda deyarli bir xil boʻladi. Lekin baribir yozishdan oldin siz yozayotgan tashkilot yoki universitet bilan yaxshilab tanishib chiqing. Oʻsha manzil qadriyatidan kelib chiqib yondoshish faqat foydangizga ishlaydi. Undan soʻng yana boshqa xat misollarini oʻqib chiqing. Ulardan oʻrganadigan narsalar ham koʻrinadi. Yoki kamchiliklarini sezsangiz, undan qochishga harakat qilasiz.
5. Tekshirib chiqing, imkon boʻlsa, boshqalarga ham oʻqib bering!
Ana bunisi qiziq? Nega oʻqib berishim kerak, demang. Odatda, bizga sezilmagan kamchiliklar yoki ortiqcha gaplar boshqalarga birdan bilinadi. Demak, ular sezdimi, tekshiruvchilar ham bilishi aniq. Yozib boʻlgach, soʻzlarni toʻgʻri yozishdan tortib, tinish belgilarning ishlatilishigacha qayta qarab chiqing. Punktuatsion aniqlik ham muhim. Maktabda diktant yozganimizda ham doim oxirida yana bir marta oʻqib chiqinglar, deya ustozlarimiz aytishar edi. Bu faqat foydamizga ishlagan.
📜 Keling, bir qiziqarli xat haqida qisqacha suhbatlashamiz:
Harvard universitetiga topshirayotgan bir talaba xatini shunday boshlagan ekan: "Men alifbodagi "S" harfini yomon koʻraman". Qiziq-a?! Oʻylaysiz, xoʻsh, nega yomon koʻrar ekan? S harfining nima aloqasi bor ekan deya. Keyin talaba xatining davomida juda chiroyli izoh berib ketgan ekan. Yaʼni, ota-onasidan birini yoʻqotganini va shu uchun ingliz tilida koʻplikni bildiruvchi bu harfga nisbatan unda gʻalati tuygʻu uygʻonganini bayon qilgan. Endi shoshmang! Qaytanga negativ fikr uygʻotib qoʻymaganmi deysizmi? Boʻlishi mumkin, lekin shu yerda talaba oʻz maqsadlarini aniq ifodalay bilishi va hayotga nisbatan yangi niyatlari paydo boʻlganligini koʻrsata olishi foydasiga ishlagan. Xullas, "Motivation letter"ni shunchaki emas, oʻzingizdagi imkoniyatlarni koʻrsata oladigan darajada yozishga harakat qiling!
Chet eldagi ta'limingizni Ucan Consulting bilan boshlang va akademik orzularingizni ro'yobga chiqaring!